„Við ákváðum að fara í sumarfrí og svo kom þetta með Perluna upp og við höfum einbeitt okkur að því en við höfum svo sem verið að tala um hvort við eigum ekki að fara af stað aftur,“ segir Aðalheiður Héðinsdóttir, stjórnarformaður Kaffitárs, aðspurð hvort starfsmenn fyrirtækisins hafi skoðað gögnin sem Isavia var gert að afhenda því í júlí og komist að niðurstöðu um hvort skaðabótamál verði höfðað gegn ríkisfyrirtækinu.

Héraðsdómur Reykjavíkur úrskurðaði í júní síðastliðnum að afhenda bæri gögnin sem fyrirtækið óskaði eftir í kjölfar forvals Isavia vegna útleigu á verslunarrými í Leifsstöð sem lauk í september 2014. Aðalheiður hafði þá í tæp tvö ár krafist rökstuðnings Isavia fyrir þeirri ákvörðun að neita fyrirtæki hennar um pláss og aðgang að gögnum sem aðrir umsækjendur sendu inn í forvalinu. Alls féllu sjö úrskurðir eða dómar í málinu en Samkeppniseftirlitið varaði við því að afhending gagnanna gæti verið brot á samkeppnislögum.

„Maður hefur einungis orku í svo og svo mikið hverju sinni og svo fer tími í áframhaldandi uppbyggingu og maður má ekki láta þetta hafa áhrif á sig,“ segir Aðalheiður og segir aðspurð að hún viti ekki hvort farið verði í að grandskoða gögnin fyrir áramót.

„Við höfum svo sem ekki rætt það en það fer nú að líða að því.“