„Sjálfstraustið var brotið og ég gat ekki hugsað mér að hleypa neinum að mér aftur.“ Þetta segir leikkonan og handritshöfundurinn Nanna Kristín Magnúsdóttir sem prýðir forsíðu október tölublaðs MAN.

Nanna Kristín er 42 ára leikkona sem útskrifaðist úr Leiklistarskóla Íslands árið 1999. Hefur hún síðan þá getið sér gott orð fyrir leik bæði í kvikmyndum og á sviði og hlotið ýmsar viðurkenningar.

Nanna á von á sínu þriðja barni í mánuðinum eins og glöggt má sjá á glæsilegri forsíðumyndinni. Segja má að líf Nönnu Kristínar hafi kúvenst á stuttum tíma. Hún skildi við barnsföður sinn, Kristinn Vilbergsson fyrir rúmum tveimur árum og var sátt við að vera ein það sem eftir væri.

Nú er hún aftur á móti ástfangin upp fyrir haus og á von á barni með kærastanum sínum Gauta Sturlusyni, en fyrir eiga þau samtals fjögur börn. Gauti er lögfræðingur og eiga Nanna Kristín bæði tvö börn fyrir úr fyrri samböndum.

Var ekki á leið í annað samband

„Sjálfstraustið var brotið og ég gat ekki hugsað mér að hleypa neinum að mér aftur. Ég var ekki á leiðinni í annað samband en svo gerðist það alveg ótrúlega fljótt,“ segir Nanna Kristín meðal annars í viðtalinu og bætir við.

„Ég var eins og ég sagði, ekkert á leiðinni í annað samband en þessu gat ég engan veginn stjórnað, ég varð bara yfir mig ástfangin og þá varð ekki aftur snúið.“

Nanna og Gautur hófu sambúð um það bil hálfu ári eftir að þau kynntust.

„Mér fannst þetta ekki erfið ákvörðun enda lá þetta beinast við. Ég tók ekki neitt „Tinder-skeið,“ segir Nanna Kristín og hlær og á þá við stefnumótaappið vinsæla Tinder.

„Ég náði kannski alveg „single tímabili“ en þá var ég bara alveg single.“