Vigdísi Hauksdóttur, borgarfulltrúa Miðflokksins , er bersýnilega brugðið við skilaboðum, SMS-i, sem hún fékk við komu til Danmerkur. Í SMS-inu er hún boðin velkomin til Danmerkur og henni tjáð að þar gildi Reiki í Evrópu.
„Símtöl og SMS innan EES og heim ásamt gagnamagni eru gjaldfærð rétt eins og notkunin þín innanlands,“ segir í skilaboðunum.
Vigdísi virðist þykja þetta heldur kaldar kveðjur og birtir á Facebook skjáskot af skilaboðunum og skrifar: „Rosalega er þetta óhuggulegt!!! Hvar er persónuverndin???“
Þóra Guðmundsdóttir, fyrrverandi varaformaður Neytendasamtakanna, skrifar athugasemd við færslu Vigdísar og segir þetta hafa ekkert með persónuvernd að gera. „Þetta hefur ekkert með persónuvernd að gera. Síminn er fjarskiptatæki sem tengist við nærliggjandi senda eða hvað þetta er nú kallað. Þetta er þjónusta. Ef þú kærir þig ekki um þetta þá geturðu skilið síman eftir heima eða í það minnsta símkortið og fengið þér nýtt á nýja staðnum,“ skrifar Þóra.
