Sigmundur Davíð Gunnlaugsson, formaður Miðflokksins og fyrrverandi forsætisráðherra, vill fá að vita hver leyfði „hálfnöktu fólki“ að nota Alþingishúsið í auglýsingaskyni og hvort það sé mat Steingríms J. Sigfússonar, forseta Alþingis, að slíkt sé til þess fallið að auka virðingu Alþingis.

Tilefni fyrirspurnar Sigmundar Davíðs, sem er í fimm liðum, er gjörningur sem er hluti af sýningunni DEMONCRAZY sem fer nú fram á Austurvelli sem hluti af Listahátíð Reykjavíkur. Sigmundur vill í fyrsta lagi fá að vita hver veitti leyfi fyrir því að „hálfnakið fólk nýtti Alþingishúsið í auglýsingaskyni og gengi þaðan á sama hátt og forseti Íslands og þingmenn gera við þingsetningu?“

Vill hann einnig vita hvort forseti Alþingis telji slíka notkun á þinghúsinu og þinghefðum til þess fallna að auka virðingu Alþingis og hvort leyfið sé tengt stuðningi forseta Alþingis við málstað listamannanna.

Sigmundur vill svo fá að vita hvort aðrir hópar megi vænta þess að fá leyfi fyrir sams konar viðburðum óháð því hvort forseti Alþingis er fylgjandi málstað þeirra eða ekki. Að lokum vill hann fá að vita hvort leyfið sé til marks um að vænta megi frekari tilslakana á reglum um klæðaburð Alþingismanna.