Þetta er met sem við viljum ekki og vonum svo sannarlega að langur tími líði þar til það verður slegið á nýjan leik. Klukkan níu í morgun féll úrkomumet í Reykjavík – aldrei hefur rignt jafn mikið í maímánuði og nú.
Þetta kom fram í Morgunútvarpinu á Rás 2 í morgun þar sem rætt var við Ólaf Þór Árnason, veðurfræðing á Veðurstofu Íslands. Gamla metið var frá árinu 1989 en í maímánuði það ár var úrkoman 126 millimetrar. Klukkan níu í morgun hafði hún mælst 127,8 millimetrar. Tekið skal fram að nýr mánuður gengur ekki í garð fyrr en á föstudag og því gæti enn bæst við í úrkomuna.
Ólafur sagði, að því er RÚV greinir frá, að veðrið þessa vikuna væri að mörgu leyti skárra en í síðustu viku þó metið vafasama hafi fallið í morgun. Hlýrra loft sé yfir landinu og þannig muni íbúar á Norður- og Austurlandi fá sól og blíðu í dag og næstu daga.
