„Ég þurfti að nudda augun til að vera viss um hvað ég sæi,“ segir Garðar Valur Hallfreðsson í samtali við Austurfrétt þegar hann sá nakta ferðamenn baða sig á Söluskálaplaninu á Egilsstöðum. Garðar hefur útsýni yfir umrætt þvottaplan og segir að þar hafi hann séð ferðamennina allsnakta.
Ferðamennirnir voru tveir og höfðu sápu meðferðis. Voru þeir að sögn Garðars hinir rólegustu á meðan þeir þurrkuðu sér og ófeimnir þó nokkur umferð hafi verið á svæðinu.
