Maðurinn sem um ræðir er breskur ríkisborgari og heitir Vishwash Kumar Ramesh og er fertugur að aldri. Hann er búsettur í London þar sem hann á eiginkonu og barn.
Ramesh sat við útgang í sæti 11A, mjög framarlega í vélinni, og segir hann í samtali við indverska fjölmiðla að þegar vélin brotlenti hafi hún brotnað í tvennt þar sem hann sat og hurðin sem hann sat við losnað af vélinni.
Dr. Dhaval Gameti, sem meðhöndlað hefur Vishwash á sjúkrahúsi, segir við AP-fréttaveituna að hann hafi verið ringlaður og með töluverða áverka víða á líkamanum eftir slysið en ekki í lífshættu.
Í samtali við Doordarsha segist Ramesh ekki átta sig á hvernig hann komst lifandi frá slysinu.
„Ég hélt um stund að ég væri að fara að deyja. En þegar ég opnaði augun sá ég að ég var á lífi. Ég spennti af mér beltið og fór,“ segir hann og rifjar upp að hann hafi horft á tvo starfsmenn um borð deyja nánast beint fyrir framan hann.
Hann segir að skömmu eftir flugtak hafi vélin byrjað að lækka flugið og líkir hann því við að vélin hafi „verið föst“. Segist hann hafa upplifað það þannig að flugmennirnir hafi reynt að hækka flugið en án árangurs og með þeim afleiðingum að hún brotlenti á byggingu skammt frá flugvellinum. Mikill eldur blossaði upp eftir brotlendinguna, enda vélin stútfull af eldsneyti, og segist Ramesh til dæmis vera með brunasár á handleggnum.
Bróðir hans sat í sömu sætaröð og hann en upp við gluggann við hinn enda gangsins. Þeir bræðurnir voru staddir á Indlandi í viðskiptaerindum og er bróðir hans talinn af eftir slysið.
Myndband af Ramesh vakti mikla athygli í gær en á því mátti sjá hann haltrandi og ringlaðan eftir slysið. Hann lýsti því að hann hafi heyrt „hvell“ áður en vélin brotlenti. „Það voru lík út um allt, ég var hræddur, stóð upp og hljóp í burtu.“
Rannsókn á tildrögum slyssins er á frumstigi en ýmsum tilgátum hefur verið varpað fram, allt frá því að tvöföld bilun hafi orðið í hreyflum vélarinnar, bilun hafi orðið í búnaði sem eykur lyftigetu vængjanna eða að vélinni hafi verið flogið á hóp fugla með þeim afleiðingum að hreyflarnir skemmdust og vélin missti afl.
