Hann er kallaður Hulk og það ekki að ástæðulausu. Hinn tuttugu og fjögurra ára gamli Sajad Gharibi frá Íran hefur lagt stund á lyftingar um margra ára skeið og hefur árangurinn ekki látið á sér standa.

Nú ætlar Sajad að slást í lið með írönskum hersveitum sem búa sig undir að glíma við hryðjuverkasamtökin ISIS á yfirráðasvæðum samtakanna í Sýrlandi. Sajad er vinsæll í Íran og virkur á samfélagsmiðlinum Instagram þar sem 127 þúsund notendur fá reglulega fréttir, beint í æð, um það sem gerist í lífi hans.

Það var á þessum vettvangi, Instagram, sem Sajad tilkynnti að hann hyggi á hættuför til Sýrlands í þeim tilgangi að ganga frá ISIS-samtökunum.

Tiltölulega lítið er vitað um einkalíf þessa tuttugu og fjögurra ára vöðvafjalls en baráttan gegn hryðjuverkum og kúgunum af öllu tagi er sögð standa hjarta hans nærri. Hann keppir í lyftingum og er hann sagður hafa náð góðum árangri á því sviði – sem þarf ekki endilega að koma á óvart ef myndir af kappanum eru skoðaðar.