Heimsbyggðin hefur fylgst með atburðum síðustu vikna í Bandaríkjunum í forundran. Sumum finnst prýðilegt að Trump skyldi sigra hina stríðsglöðu kerfiskonu Hillary, og segja að með þessu neyðist bandaríska þjóðin til að horfast í augu við vægðarlausar afleiðingar hnignandi menningar. Kannski verður þetta þjóðinni hollt, líkt og efnahagshrunið var okkur Íslendingum – hver veit?

Nú beinast þó augu heimsins að Melaniu Trump, eiginkonu Donalds – sérstaklega í ljósi þess að í kosningabaráttunni kom ítrekað í ljós hvers konar viðhorf hann ber til kvenna. Þetta myndbrot frá embættistöku nýja forsetans hefur sérstaklega valdið áhyggjum:

Í myndbrotinu sést Donald snúa sér að brosandi eiginkonu sinni – segja eitthvað og snúa sér aftur frá henni. Breytingin á svip hennar er greinileg og á sama tíma óhugguleg.

Ýmsir hafa spáð í atferli og líkamstjáningu þeirra hjóna, síðan ljóst var hverjir myndu flytja næst inn í Hvíta húsið.

Til að mynda vakti þessi sena athygli, þar sem Trump hjónin koma til fundar við Obama hjónin:

Trump drífur sig upp tröppurnar til að heilsa Obama hjónunum og Melania fylgir á eftir með pakka handa Michelle. Það er greinilegt á látbragði hans að Melania skiptir hann engu máli. Hann lítur ekki einu sinni í áttina til hennar.

Síðar í sömu senu, þegar Melania hefur fært Michelle gjöfina, sést að Barack kemur konu sinni til hjálpar þegar gjafakassinn er farinn að verða fyrir. Það má segja ýmislegt um Obama, til að mynda að hann hafi aukið útgjöld til hernaðarmála gríðarlega í stjórnartíð sinni og valdið skelfilegu tjóni með drónahernaði, en kurteis er hann.

Fyrsti dans forsetahjónanna nýju eftir embættistökuna hefur líka vakið athygli og þykir gefa í skyn að hann líti fremur á hana sem eignarhlut en félaga og jafningja. Þar sést Donald halda pinnstífri Melaniu og þrýsta mjöðmum hennar að sínum. Hún hallar sér ekki aðeins í átt frá honum, heldur eru fingur hennar stífir í hönd eiginmannsins.

Hvers vegna þessar pælingar?

Jú sjáið til – Donald Trump er maður sem hefur gegnum tíðina stært sig af því að áreita konur kynferðislega og misnota frægð sína og ríkidæmi til að ráðskast með þær. Hann er þegar byrjaður að grafa undan réttindum bandarískra kvenna varðandi yfirráð yfir líkömum sínum með breytingum á lögum um fóstureyðingar og því að loka fyrir fjárframlög til samtakanna Planned Parenthood. Hann hefur aftur sett í gildi reglu sem bannar erlendum samtökum sem þiggja bandaríska fjárhagsaðstð vegna kynfræðslu og skyldra málefna að veita upplýsingar um fóstureyðingar.

Heimild: Mic.