Dóttir mín á tveggja ára afmæli á morgun og haldið verður uppá það næstkomandi helgi. Hún er einstaklega hrifin af Frozen teiknimyndinni og öllu því sem henni fylgir. Það lá því beinast við að hafa þemað í afmælinu í anda Frozen og þeir sem þekkja mig vel vita að þegar kemur að veislum þá hef ég mikinn metnað og hef sérstaklega gaman af því að prófa mig áfram með nýjar uppskriftir.
Ég sýndi frá því á snappinu mínu í gær þegar ég bakaði marengstoppa með Frozen ívafi, en þeir eru í laginu eins og hvít jólatré með bláum röndum.
Stífþeyta 3 eggjahvítur og 200 gr hvítan púðursykur þar til marengsinn er orðin það stífur að hægt er að hvolfa skálinni án þess að hann falli úr.
Bæta við 1 poka súkkulaðihúðað lakkrískurl og smátt skorið 100 gr hvítt súkkulaði. Hræra þessu varlega saman við með sleif. Láta síðan 1 dropa af bláum matarlit út í og rétt hræra honum saman við, alls ekki hræra hann mikið.
Síðan er tekin sprautustútur (ég nota frá Allt í köku og finnst mér hann lang bestur) og settur ofan í glas. Snúið honum á rönguna og setjið bláan matarlit með prjón (eða einhverju með mjóan odd) og teiknið 4 þunnar línur innan á sprautustútinn. Þær þurfa ekki að vera þráðbeinar eða vandaðar, það kemur ekki að sök þótt þær séu skakkar þar sem útkoman verður alltaf falleg.
Setjið marengsinn ofan í sprautuna og passið að hafa engan stút á. Næst er að kreista marengsinn á bökunarpappír og móta lítil jólatré með sprautunni.
Bakið toppana á 140°c í 25 mínútur við blástur.
Njótið!
Endilega fylgstu með mér á snapchat en þar er ég dugleg að sýna frá allskonar uppskriftum sem ég er að prófa mig áfram með. Snap: anitaeh
