Swansea sem situr á botni ensku úrvalsdeildarinnar vann öflugan 1-0 sigur á Liverpool í ensku úrvalsdeildinni í kvöld.

Liverpool hafði ekki tapað í 18 leikjum í röð í öllum keppnum þegar liðið heimsótti Liberty völlinn í kvöld.

Liverpool vann Manchester City í síðustu umferð deildarinnar og bjuggust flestir við öruggum sigri Liverpool.

Það var hins vegar ekki raunin, Alfie Mawson varnarmaður Swansea skoraði eina mark leiksins í fyrri hálfleik.

Virgil van Dijk varnarmaður Liverpool skallaði knöttinn til hans eftir hornspyrnu og Mawson þakkaði fyrir sig með því að setja boltann framhjá Loris Karius.

Liverpool skapaði sér ekki mörg dauðafæri í leiknum og var liðið ólíkt því sem það hefur sýnt síðustu vikur.

Liverpool situr í fjórða sæti með 47 stig en Swansea er á botni deildarinnar með 20 stig.