Ferð Önnu Maríu Ómarsdóttur á EM í Frakklandi var hársbreidd frá því að lenda í endurvinnslu en þökk sé móður hennar, Ingveldi Gísladóttur, verða Anna María og kærastinn hennar á leikvanginum í St. Etienne þann 14. júní þegar íslenska landsliðið leikur sinn fyrsta leik á mótinu, gegn liði Portúgals.

Anna María, sem er 25 ára og starfar á leikskólanum Arnarsmára í Kópavogi, vann ferð fyrir tvo á EM í tappaleik Coca-Cola en tvær flöskur af drykknum fylgdu með hamborgaratilboðum sem hún og kærastinn hennar, Bjarki Gunnarsson, keyptu á Bad Boys Burgers and Grill á Vesturlandsvegi í maí. Hún segist ekkert hafa leitt hugann að því að vinningar gætu leynst í tappanum og höfðu tómar flöskurnar legið í bíl hennar í nokkra daga þar til nýlega þegar hún og Bjarki fóru í heimsókn til Ingveldar, móður Önnu Maríu.

Anna María tók flöskurnar tvær með sér inn úr bílnum og henti þeim í poka sem Ingveldur notaði fyrir tómar flöskur og dósir. „Mamma gamla tók flöskurnar upp úr honum og fór í tölvuna og athugaði hvort það væri vinningur í töppunum,“ segir Ingveldur frá. „Þá kom í ljós að það var vinningur í öðrum þeirra og ég hugsaði „ohh dí er hún búin að vinna?“ bætir Ingveldur við og hlær. Því næst gekk hún með tölvuna yfir til Önnu Maríu og Bjarka, sýndi þeim tölvuskjáinn og sagði „sjáið, þið eigið þennan tappa!“ Hún segir þau varla hafa trúað þessu en í kjölfarið hafi tekið við „eintóm gleði!“

Anna María segir að sér hafi brugðið verulega við að sjá vinningsskilaboðin sem mamma hennar sýndi henni á tölvuskjánum. „Við störðum á skjáinn þar sem stóð einfaldlega „Til hamingju, þú hefur unnið ferð á EM.“ Svo vorum við svo hissa að við sögðum eiginlega ekki neitt, þetta var svo óraunverulegt. Ég hef aldrei unnið í svona leik áður. Svo skoðuðum við síðuna aftur og aftur og þá varð þetta mjög raunverulegt.“

Anna María og Bjarki halda til Frakklands mánudaginn 13. júní og koma heim tveimur dögum síðar. Þau höfðu ekki ætlað á EM í Frakklandi líkt og þúsundir annarra Íslendinga en eru gríðarlega ánægð með vinninginn. „Bjarki er mikill fótboltaunnandi og það var draumur hjá honum að fara á EM. Ég viðurkenni að ég er ekki mikill fótboltaaðdáandi en ég varð það við að vinna þessa ferð og við hlökkum mikið til að fara.