„Þann daginn fauk fjárhagslega öryggið út um eldhúsgluggann,“ skrifar Anna Karen Kristjánsdóttir, sambýliskona Sævars Guðmundssonar, á Facebook um þá ákvörðun hans að ráðast, ásamt Sölva Tryggvasyni í gerð heimildamyndar um undankeppni EM í knattspyrnu. Myndin verður frumsýnd í kvöld, föstudag.

Lengi vel gekk erfiðlega að fjármagna myndina en eins og gefur að skilja hefur það tekið á fjölskyldur þeirra. „Allir hafa fengið að finna fyrir því, en um leið vonandi lært að það er mikilvægt, göfugt og gott að hafa ástríðu og að af henni geti skapast stórmerkileg verk … sem ég efast ekki um að þessi mynd sé,“ skrifar hún og bætir við: „Til hamingju með áfangann, ég trúi því einlæglega að þið hafið skapað verðmæti fyrir fótboltahreyfinguna alla með gerð þessarar myndar.“