„Þeir spurðu hvað þetta hvíta fólk væri að gera þarna með þessum svörtu mönnum og við tókum einfaldlega upp hanskana að íslenskum sið,“ segir forsetaframbjóðandinn Halla Tómasdóttir um leið og hún rifjar upp eftirminnilega lífsreynslu sem hún varð fyrir þegar hún var búsett í suðríkjum Bandaríkjanna.
Í samtali við Brennsluna á FM957 í morgun rifjaði Halla upp þegar hún var framkvæmdastjóri fótboltaliðs í Alabama. Sá hún þar meðal annars um að sækja fótboltamenn erlendis frá, meðal annars Íslandi, Norðurlöndunum og Bretlandi. Einn af þeim sem spiluðu með liðinu var Guðjón Skúlason og eitt kvöldið komust þau Halla í hann krappan.
„Við vorum úti með körfulboltaliðinu og þeir voru margir svartir. Það voru miklir fordómar í suðurríkjunum á þessum tíma og þetta var seint um kvöld. Þeir spurðu hvað þetta hvíta fólk væri að gera þarna með þessum svörtu mönnum og við tókum einfaldlega upp hanskana að íslenskum sið,“ segir Halla.
„Það næsta sem við vissum lágum við bæði rotuð og enduðum á spítala eftir að hafa verið lamin af einhverjum suðurríkjamönnum sem líkaði ekki við okkur,“ bætir hún því næst við en greina mátti þó að hún brosir í kampinn yfir þessari óvenjulegu lífsreynslu.
„Þannig að ég lenti í ýmsum ævintýrum þarna í suðurríkjunum. Lærði sitthvað um fordóma.“
