Breskur maður sem var hæddur og smánaður vegna tanna sinna er nú orðið hið mesta kvennagull eftir að hann fékk nýjar tennur í Tyrklandi. Breytingin er gríðarleg.

Breska blaðið The Daily Star greinir frá þessu.

Maðurinn, hinn 35 ára Johnathon Pratt, var með svo bjagaðar tennur að það háði honum í félagslífinu. Má segja að tennur hans hafi minnt á tennur moldvörpurottu eða hross.

Lenti Pratt í miklu einelti sem barn og þegar hann komst á unglings og fullorðinsár átti hann í erfiðleikum með að kynnast stúlkum.

Tennurnar voru ekki aðeins mikið útlitslegt lýti heldur uxu þær þannig að þær ollu honum miklum kvölum. Liðu stundum margir dagar þar sem hann treysti sér ekki til þess að borða fyrir sársauka.

Brosti aldrei

Í janúar á þessu ári fékk Pratt loksins nóg og bókaði sér ferð til Tyrklands til að láta breyta stellinu. Fór hann í mikla aðgerð þar sem allar tennurnar voru rifnar úr honum og tannplantar settir í staðinn.

Breytingin er ótrúleg eins og myndirnar sýna.

„Áður en ég fór í aðgerðina ollu tennurnar mér þunglyndi. Ég gat ekki borðað almennilega þar sem ég var svo kvalinn, þetta hafði áhrif á röddina mína og ég brosti aldrei. Ég hef verið lagður í einelt alla ævi, uppnefndur og misst af alls konar tækifærum,“ segir Pratt. „Ég hef verið kallaður hrossakjaftur í mörg ár. Sagt var að ég gæti étið epli í gegnum tennisspaða. Ég hef haldið mig frá stefnumótum af því að konur hafa sagt að tennurnar væru svo slæmar að þær myndu ekki láta sjá sig dauðar með mér.“

Betra en lottóvinningur

Kostnaðurinn var stór hindrun fyrir Pratt. Í Bretlandi hefði aðgerðin kostað 35 þúsund pund, það er um 6 milljónir króna. Í Tyrklandi kostaði þetta hins vegar aðeins 9.500 pund, það er rúma 1,5 milljón króna.

Þurfti hann ekki að hugsa sig um tvisvar. Hann segir að sársaukinn hafi ekki einu sinni verið það mikill, aðgerðin tók einnig innan við 3 klukkutíma. Það versta hafi verið bólgan eftir aðgerðina. En núna lítur hann frábærlega út og segist njóta lífsins.

„Þetta er betra en að vinna í lottóinu,“ segir Pratt. „Fólk horfir á mig eins og venjulega manneskju og það er ótrúleg tilfinning.“