Héraðsdómur Reykjavíkur hefur sakfellt mann fyrir umsáturseinelti. Hann setti sig tvívegis í samband við konu með því að senda henni tvær vinabeiðnir á TikTok og hann sendi sambýliskonu hennar eina vinabeiðni á TikTok og aðra á Instagram. Einnig var hann ákærður fyrir að aka tvisvar bíl um bifreiðastæði við vinnustað konunnar.
Mannlíf greindi fyrst frá en dóm málsins má lesa hér.
Hinn ákærði hefur áður sætt nálgunarbann gagnvart konunni og hann hefur áður verið dæmdur fyrir umsáturseinelti gagnvart henni. Segir í dómi að hann hafi haft þráhyggju gagnvart konunni í 14 ár.
Maðurinn játaði sök sem var metið honum til refsimildunar. Var hann dæmdur í tíu mánaða fangelsi, en þar af eru sjö mánuðir skilorðsbundnir. Hann var dæmdur til að greiða brotaþola 250 þúsund krónur í miskabætur.
