Patrice Evra hefur gagnrýnt harðlega fyrrverandi liðsfélaga sína hjá Manchester United fyrir að gagnrýna Michael Carrick, núverandi bráðabirgðastjóra félagsins.

Evra nefndi sérstaklega Paul Scholes, Gary Neville og Roy Keane og sakaði þá um að reyna að „drepa feril“ Carrick með neikvæðum ummælum í fjölmiðlum. Þremenningarnir hafa undanfarið sagt að Carrick ætti ekki að fá starfið til frambúðar í sumar, þar sem þeir telja hann ekki hafa næga reynslu sem knattspyrnustjóri.

Scholes vakti nýlega athygli þegar hann kallaði frammistöðu Manchester United „hræðilega“ í færslu á Instagram eftir tap gegn Newcastle.

Evra, sem vann fimm enska meistaratitla með United, segir gagnrýnina ósanngjarna. „Ég vona að Instagram-færsla Scholes hafi verið fölsuð. Ég vona að einhver hafi brotist inn á aðganginn hans,“ sagði Evra.

Hann sagðist ekki skilja hvers vegna Carrick fengi ekki meiri stuðning frá fyrrverandi leikmönnum félagsins. „Michael er einn af okkur og hann er að gera mjög góða hluti. Ég skil ekki þessa neikvæðu umræðu frá Scholes, Roy Keane og Gary Neville,“ sagði Evra.

Frakkinn benti einnig á að gagnrýnendurnir hefðu sjálfir ekki náð miklum árangri sem knattspyrnustjórar. Hann rifjaði upp stutta og erfiða dvöl Gary Neville hjá Valencia.

„Ég sagði við Neville. Það er auðvelt að tala í sjónvarpi. Þegar þú varst hjá Valencia báðu þeir um paellu en þú gafst þeim fisk og franskar,“ sagði Evra í kaldhæðni.

Að hans mati ættu fyrrverandi leikmenn að fara varlega í gagnrýni. „Sem leikmenn eru þeir goðsagnir, en sem stjórar hafa þeir ekki náð miklum árangri. Þess vegna er of mikið að tala svona og mögulega skaða feril annars þjálfara,“ sagði Evra.

Carrick hefur stýrt United tímabundið eftir að Ruben Amorim var rekinn fyrr á árinu og er félagið enn að skoða hver eigi að taka við liðinu til frambúðar.