Brooklyn Beckham fékk glæsilega afmælisgjöf frá eiginkonu sinni Nicola Peltz á sama tíma og spennan virðist enn ríkja á milli hans og fjölskyldu hans.
Peltz, sem er fyrirsæta og leikkona, deildi myndum á Instagram þar sem sjá mátti veglega afmælisuppákomu fyrir eiginmann sinn sem varð 27 ára. Þar mátti sjá gullblöðrur, blóm, gjafir og bleika kleinuhringi sem mynduðu skilaboðin „Happy Birthday, Brooklyn“.
Brooklyn virtist ánægður með óvænta uppákomuna og sagði meðal annars: „Vá, þetta er flott,“ þegar hann sá afmælisuppsetninguna.
Fyrr sama dag höfðu foreldrar hans, David og Victoria Beckham, einnig sent honum opinberar afmæliskveðjur á samfélagsmiðlum þrátt fyrir að samband þeirra hafi verið stirt undanfarið. David birti gamla mynd af Brooklyn og skrifaði. „27 í dag. Til hamingju með afmælið, Bust. Við elskum þig.“
Victoria birti einnig kveðju þar sem hún skrifaði. „Til hamingju með afmælið Brooklyn, við elskum þig svo mikið.“
Brooklyn virtist ekki hafa neinn áhuga á þessum kveðjum og endurbirti þær ekki á Instagram síðu sinni. Samkvæmt fjölmiðlum hefur Brooklyn óskað eftir því að foreldrar hans hafi ekki opinber samskipti við sig og að þau hafi aðeins samband í gegnum lögfræðing hans.
Brooklyn vakti einnig athygli í janúar þegar hann greindi frá áframhaldandi deilum innan fjölskyldunnar og sagðist ekki hafa áhuga á að sættast að svo stöddu.
