Nokkrum starfsmönnum Ríkislögreglustjóra var sagt upp í gær í sparnaðarskyni, sama dag og tilkynnt var að umdeildur stjórnendaráðgjafinn hefði verið ráðinn tímabundið í fullt starf hjá embættinu. Frá þessu greinir RÚV.

Spegillinn fjallaði í gær um umfangsmikil viðskipti embættisins við ráðgjafafyrirtækið Intru undanfarin fimm ár. Intra er í eigu stjórnunarráðgjafans Þórunnar Óðinsdóttur sem er eini starfsmaður félagsins.

Á fimm árum hefur embættið greitt Þórunni á annað hundrað milljónir fyrir ráðgjöf sem meðal annars hefur falið í sér verslunarferðir í Jysk og vangaveltur um staðsetningu á píluspjaldi. Málið hefur vakið töluverða úlfúð enda er þarna sýslað með opinbert fé og eins þar sem embættið þurfti að fá 80 milljón króna fjárveitingu á fjáraukalögum í sumar til að fjármagna nýliðanámskeið fyrir sérsveitina sem annars hefði fallið niður.

Eftir umfjöllun Spegilsins greindi embættið frá því að Þórunn hefði verið ráðin þar tímabundið í fullt starf. RÚV greinir nú frá því að fréttastofan hafi unnið lengi að umfjölluninni sem birtist í gær. Fyrsta fyrirspurn var send á ríkislögreglustjóra um miðjan maí þar sem óskað var eftir upplýsingum um viðskipti embættisins við Intra.

Svör bárust ekki fyrr en þremur vikum síðar, voru almenns eðlis og innihéldu engin gögn. Þann 3. september óskaði fréttastofa eftir tímaskýrslum Þórunnar og tveimur dögum síðar var gerður við hana ráðningarsamningur um fullt starf. Starfið er tímabundið til þriggja mánaða og var ekki auglýst. Embættið upplýsti ekki fréttastofu um ráðninguna fyrr en í gærkvöldi.

RÚV segist hafa heimildir fyrir því að um tíu starfsmönnum hafi verið sagt upp í sparnaðarskyni hjá ríkislögreglustjóra í gær.

Nánar má lesa um málið hjá RÚV.

Uppfært: Í fréttatíma RÚV var rætt við Sigríði Björk þar sem hún sagði embættið hafa verið með ráðningabann í „einhverja sex mánuði“ og alls sé nú að fækka um tuttugu og tvær stöður hjá embættinu.