Hjónin, Brynhildur Karlsdóttir og Matthías Tryggvi Haraldsson hafa sett íbúð sína við Álfatún í Kópavogi á sölu. Ásett verð er 95,9 milljónir króna.
„Við kveðjum frábæru íbúðina okkar í Álfatúni og Fossvogsdalinn full af þakklæti og ást. Vonandi taka frábærir nýir eigendur við, við ætlum að flytja út í sveit,“ segir Brynhildur á Facebook.
Íbúðin er 135,6 fm, fimm herbergja íbúð á jarðhæð með sérinngangi, í þríbýlishúsi, sem byggt var árið 1984. Íbúðin skiptist í anddyri, hol, eldhús, tvær stofur, þrjú svefnherbergi, baðherbergi og þvottahús.
Sérafnotaflötur með viðarverönd til suðurs. Möguleiki er á að bæta fjórða svefnherberginu við með því að loka sjónvarpsstofu.
Húsið er staðsett innarlega í botnlangagötu með bakgarðinn bókstaflega samvaxinn við Fosvogsdalinn, Kópavogsmegin. Beint aðgengi um stíg frá garði og í dalinn.
Brynhildur er sviðslistakona, tónlistarkona, dagskrárgerðarmaður, danshöfundur og skáld. Matthías er tónlistarmaður og dramatúrg í Þjóðleikhúsinu. Matthías keppti í Eurovision með hljómsveitinniHatara, með laginu Hatrið mun sigra, árið 2019. Hjónin giftu sig í ágúst árið 2023 og eiga saman tvö börn.
Nánari upplýsingar um eignina má finna hér.
