Luis Suarez, fyrrum leikmaður Barcelona, hefur varað hinn unga Lamine Yamal við því að hann eigi enn mikið eftir ólært þrátt fyrir að vera orðinn lykilmaður hjá félaginu og einnig spænska landsliðinu.

Yamal er einn efnilegasti ef ekki efnilegasti leikmaður heims en hann er aðeins 17 ára gamall og hefur nú unnið bæði spænsku deildina og EM.

Suarez er gríðarlega mikill aðdáandi Yamal en varar leikmanninn þó við því að hann eigi mikið eftir ólært innan vallar sem mun koma á næstu árum.

,,Lamine er leikmaður sem er að sýna gríðarlegan þroska á þessum aldri miðað við aðra,“ sagði Suarez.

,,Hann tekur ábyrgð í stóru leikjunum og er auðvitað mikill stuðningsmaður Barcelona. Ég er mjög ánægður fyrir hans hönd.“

,,Hann þarf að halda áfram að njóta þess að spila og öðlast reynslu til að bæta sig. Það eru enn hlutir sem hann þarf að læra, hlutir sem við lærum frá 18 til 25 ára aldurs. Hann er að stimpla sig inn og er að gera gæfumuninn í leikjum.“