Fanndís Friðriksdóttir kom inná sem varamaður í íslenska kvennalandsliðinu í kvöld er liðið mætti Frökkum í Þjóðadeildinni og tapaði 2-0 á Laugardalsvelli.

Fanndís er reynslumikill leikmaður en hún var að snúa aftur í landsliðið eftir fimm ára fjarveru og spilaði um 20 mínútur í þessum leik.

Fanndís ræddi endurkomuna í samtali við RÚV eftir lokaflautið og gerir sér vonir um að spila á EM í Sviss í sumar.

,,Þetta var bara svekkjandi í ljósi þess að við fáum á okkur klaufamörk og slökktum á okkur í nokkrar mínútur. Við hefðum getað refsað þeim tvisvar í fyrri hálfleik en sá seinni var erfiður fyrir okkur,“ sagði Fanndís við RÚV.

,,Þetta kall í landsliðið var kærkomið, þegar maður datt út fyrst vegna barneigna þá ætlaði maður sér ekki að vera í burtu í fimm ár en ég er þakklát fyrir kallið.“

,,Ég er þakklát fyrir tækifærið og þetta var mjög gaman og það kitlar alveg að spila á EM og vonandi verða tækifærin fleiri.“