Hjörvar Hafliðason, sjálfur Dr. Football segir að Gylfi Þór Sigurðsson verði að finna gleðina aftur til að ná sér á flug með Víkingi.
Gylfi gekk í raðir Víkings fyrir tímabilið og hefur skorað eitt mark í fyrstu níu leikjunum sínum í Bestu deildinni.
„Ég held að eitt sem Gylfi þarf að pæla í, ef hann ætlar að vera áfram í fótbolta 36 ára. Þá verður hann að hafa gaman af þessu, svona líkamstjáning var eins og það væri ekki nein biluð gleði,“ sagði Hjörvar Hafliðason stjórnandi Dr. Football.
Hrafnkell Freyr Ágústsson sérfræðingur þáttarins segist sjá sömu hluti og hann sá hjá Val síðasta sumar. „Mér finnst þetta sama og var í gegnum 8-9 leikja törn hjá Val undir lokin í fyrra, baða út höndum og yppa öxlum. Mér finnst þetta ekki búið að vera gott.“
Hjörvar segir að Gylfi þurfi að gefa af sér og njóta leiksins. „Hann þarf að gefa meira af sér, maður þarf að upplifa að hann hafi gaman af þessu. Það er ekki gaman að tapa leikjum.“
