Eins og staðan er núna, þá telja finnsk yfirvöld þessa hernaðaruppbyggingu ekki vera ógn við Finnland en það getur breyst að sögn finnsku leyniþjónustunnar.
Gervihnattarmyndir af svæðunum við landamæri Rússlands og Finnlands sýna að Rússar hafa slegið upp miklum fjölda tjalda þar, reist nýja birgðageymslu þar sem er hægt að geyma 50 skriðdreka og þeir hafa einnig gert upp þyrluflugvöll sem hafði staðið ónotaður árum saman.
Með öðrum orðum, þá eru Rússar að vígbúast mjög nærri landsvæði NATÓ.
Þetta segja The New York Times og finnska ríkisútvarpið YLE.
Um leið og ljóst var að Finnar ætluðu að ganga í NATÓ sögðu talsmenn rússneskra stjórnvalda að sú ákvörðun væri „hættuleg“ og „söguleg mistök“ sem myndi auka hættuna á átökum á svæðinu. Af þeim sökum áttu Finnar von á að Rússar myndu vígbúast nærri finnsku landamærunum.
Finnar eru alvanir að vera á varðbergi gagnvart Rússum. Þeir undirbúa sig alltaf undir hið versta enda er það djúpt grafið í finnsku þjóðarsálina að vera við öllu búin frá Rússum. Á meðan Evrópubúar hugsa með sér: „Fjandinn, Rússar ætla að beita hernum,“ þá hafi Finnar alltaf vitað það og það er góð ástæða fyrir því.
Rússar réðust inn í Finnland 1939 og hófu það sem síðar var kallað „Vetrarstríðið“. Því lauk ári síðar með undirritun friðarsamkomulags en Finnar neyddust til að láta 9% af landinu af hendi.
Finnar haf upplifað innrásir, hungur og miklar efnahagskreppur. Þeir vita því vel hvernig það er að lifa á erfiðum tímum.
Allt fram að innrás Rússa í Úkraínu, reyndu Finnar að eiga í „skynsamlegu sambandi“ við Rússa. Það hefur alltaf verið mat þeirra að mesta ógnin stafi frá Rússlandi og því völdu þeir að nálgast þetta með því að eiga viðskipti við Rússa og viðræður, frjálslynda stefnu varðandi vegabréfsáritanir fyrir íbúa í landamærahéruðunum, viðskipti þvert á landamærin og að vera ekki með í NATÓ.
En Finnar gjörbreyttu um stefnu þegar Rússar réðust inn í Úkraínu.
