Verslun Pennans Eymundsson að Laugavegi 77 verður skellt í lás klukkan 18:00 í dag fyrir fullt og allt, en Penninn ehf. hefur starfrækt þar verslun frá árinu 2014. Á næstu vikum verður svo stærri og glæsilegri verslun opnuð á Selfossi í nýju húsi við Larsenstræti.

Samkvæmt fréttatilkynningu er leigusamningurinn á Laugavegi runninn út og eins stendur til að breyta efri hæðum hússins í íbúðir. „Við treystum okkur ekki til að reka verslunina meðan á framkvæmdum stendur,“ útskýrir Ingimar Jónsson, forstjóri Pennans ehf., í tilkynningu. Þegar verslunin við Laugaveg lokar verður innréttingum og vörum þaðan ekið á Selfoss.

„Við erum að opna stærri og glæsilegri verslun á Selfossi á næstu vikum. Búðin á Selfossi verður 350 fermetrar í nýju húsi við Larsenstræti sem er afar öflugt verslunarsvæði,“ segir Ingimar. Eins hafa verslanir Pennans Eymundsson við Skólavörðustíg og Austurstræti verið endurskipulagðar.

„Breytingarnar á þessum búðum hafa mælst afar vel fyrir og það er mikið líf og fjör í þeim eftir að við gerðum barnabókum og leikföngum hærra undir höfði,“ segir Ingimar.

Penninn ehf. rekur 16 verslanir um land allt undir merkjum Pennans Eymundsson. Eins rekur félagið húsgagnaverslun, fyrirtækjaþjónustu og heildverslun. Penninn er svo að reka þrjár ferðamannaverslanir undir nafninu The Viking og eina undir nafninu Islandia. Um er að ræða rótgrónar verslanir í íslensku samfélagi sem byggja á gömlum grunni. Verslunin Eymundsson var stofnuð árið 1872 og Penninn árið 1932. Verslanirnar sameinuðust árið 1996 undir einu nafni, Penninn Eymundsson.