Arsenal gæti þurft að selja að minnsta kosti einn leikmann úr aðalliðinu í sumar til að jafna fjárhaginn, samkvæmt frétt Telegraph.

Samkvæmt heimildum stendur nú yfir umræða innan félagsins um hvaða leikmaður gæti skilað mestum tekjum ef hann yrði seldur. Einnig er verið að skoða hvort fleiri en einn leikmaður þurfi að yfirgefa Emirates-völlinn á komandi félagaskiptamarkaði.

Talið er að tveir uppaldir leikmenn félagsins, Ethan Nwaneri og Myles Lewis-Skelly, gætu verið meðal þeirra sem fari. Báðir hafa átt erfitt með að festa sig í sessi í liðinu að undanförnu.

Að auki eru nöfn lykilmanna eins og Martin Ødegaard og Gabriel Martinelli einnig sögð hafa komið upp í umræðunni sem mögulegir sölukostir.

Arsenal þarf að huga vel að fjármálunum eftir að félagið eyddi um 268 milljónum punda í leikmannakaup á síðasta reikningsári. Forráðamenn félagsins vilja því tryggja að reksturinn haldist innan reglna fjármálalegs jafnvægis.