Það er óhætt að segja að samband milli Viktor Gyokeres og félags síns, Sporting í Portúgal, sé í molum. Nú er fjallað um símtal hans í forseta félagsins á dögunum í portúgalska miðlunum Record.

Framherjinn vill burt og er ansi eftirsóttur. Það er talið líklegast að hann endi hjá Arsenal og þangað vill hann fara. Fyrr í sumar var mikil fjallað um meint heiðursmannasamkomulag milli Gyokeres og Sporting um að hann mætti fara fyrir 60 milljónir punda, auk 10 milljóna seinna meir, en forseti félagsins Frederico Varandas sagði það algjört bull.

Gyokeres er brjálaður yfir þessu og taldi samkomulagið í gildi. Á hann nú að hafa hringt í Varandas þar sem hann sagði honum að hann ætlaði sér að fara til Arsenal í sumar og brýndi fyrir honum hvað þetta væri mikilvægt augnablik á ferli hans.

Þá á Svíinn að hafa sagt að ef útspil Sporting verði til þess að Arsenal leitar annað í framherjamálum muni hann aldrei fyrirgefa þeim sem báru ábyrgð á málum hans hjá Sporting.

Loks kemur það ekki til greina hjá Gyokeres að mæta aftur til æfinga hjá Sporting eftir sumarfrí, allavega ekki af fúsum og frjálsum vilja.