Víkingur tapaði fyrir nýliðum Aftureldingar í Bestu deild karla í gær og voru sparkspekingar allt annað en hrifnir af frammistöðu Víkings í leiknum.

Fram að þessu hafði Víkingur unnið leiki sína gegn hinum nýliðunum, ÍBV, sem og KA í deildinni í sumar en tapað sannfærandi fyrir Eyjamönnum í bikarnum skömmu síðar.

„Þetta var bara ekki gott og það voru leikmenn þarna inni á sem voru bara hræðilega lélegir. Ég man ekki eftir því að Davíð Örn Atlason hafi verið svona lélegur, hann hitti ekki fyrirgjöf. Erlingur Agnarsson, Daníel Hafsteinsson, voru ekki góðir,“ sagði Valur Gunnarsson um Víkingsliðið í Innkastinu á Fótbolta.net.

Sæbjörn Steinke sagði þá að Víkingur þyrfti að fá meira út úr Gylfa Þór Sigurðssyni, sem kom eftirminnilega til félagsins í vetur.

„Við verðum að auglýsa eftir honum. Menn voru að taka boltann af honum í návígum og svona eins og þetta væri bara hver annar leikmaður. Maður bjóst við að hann væri betri í að stíga menn út og svoleiðis,“ sagði hann áður en Valur tók til máls á ný.

„Maður er í smá sjokki. Maður hefur alltaf svo mikla trú á þessu Víkingsliði, að þeir fari í gang og vinni kannski á síðustu fimm mínútunum. En það var ekkert í þessum leik sem sagði mér að Víkingur væri að fara að gera það.“