Sævar Þór Sveinsson, sem heldur utan um síðuna Utanvallar.is, var gestur Helga Fannars Sigurðssonar í Íþróttavikunni á 433.is og fór yfir fjármálahlið íþróttanna.

Það var farið yfir afleiðingar þess að falla úr Bestu deild karla og í Lengjudeildina í þættinum. Eru þær jafnvel alvarlegri fyrir stærri lið sem setja meiri peninga í starfið.

„Samstöðubætur sem lið í efstu deild fá frá UEFA eru um 35-36 milljónir á ári. Svo ertu með sjónvarpsréttinn og tölfræðiréttindin sem ÍTF heldur utan um, það er um 22 milljónir. Þessar tekjur eru því yfir 50 milljónir sem þú missir af.

Svo ferðu niður í Lengjudeildina og þá er kannski erfiðara að sannfæra styrktaraðila um að borga jafnmikið. Þú ert minna í sjónvarpinu og þess háttar. Þú ert að fara að tapa tekjum á ýmsum vígstöðvum,“ sagði Sævar um málið.

„Svo ertu með launaháa leikmenn og þá er þetta spurning um að þrauka eitt tímabil í Lengjudeildinni eða selja þá, og þá ertu sennilega að gera það ódýrt.“

KR var nefnt í þessu samhengi, þetta stórlið var afar nálægt því að fara niður í sumar.

„Reksturinn hjá KR mætti vera töluvert betri. Þeir eru með þó nokkuð af skuldum, 20 milljóna króna yfirdrátt og háir vextir af því, svo er langtímalán upp á 10 milljónir. Skuldahlutfallið af eignum er hátt.

Ef við tölum um þessi hefðbundnu stórlið á Íslandi er KR líklega verst statt núna. Þetta er lið sem vill vera þarna uppi og leikmannahópurinn og eyðslan í takt við það. En árangurinn hefur ekki verið eftir því og því spíralast þetta svona,“ sagði Sævar um Vesturbæjarstórveldið.

Þátturinn í heild er í spilaranum.