KR hefur staðfest að Hilmar Árni Halldórsson sé orðinn nýr aðstoðarþjálfari karlaliðsins. Skrifar hann undir þriggja ára samning.
Theodór Elmar Bjarnason hætti sem aðstoðarþjálfari liðsins eftir liðið tímabilið en það var hans fyrsta ár í starfi.
Hilmar Árni hefur þjálfað yngri flokka hjá Stjörnunni auk þess að koma að þjálfun kvennaliðs Álftanes. Hilmar er 33 ára gamall.
Hilmar ákvað að hætta í fótbolta á síðasta ári en um langt skeið var hann einn besti leikmaður efstu deildar hjá Stjörnunni.
Hann fer nú í starf hjá KR og mun aðstoða Óskar Hrafn Þorvaldsson í Bestu deildinni á næstu leiktíð.
Tilkynning KR
Hilmar Árni Halldórsson hefur verið ráðinn sem aðstoðarþjálfari karlaliðsins til næstu þriggja ára!
Hilmar Árni lagði skóna á hilluna eftir farsælan knattspyrnuferil árið 2024. Á sínum ferli lék hann 192 leiki í efstu deild og skoraði í þeim 71 mark. Auk þess spilaði hann 4 A landsleiki!
Síðasta árið hefur Hilmar Árni starfað sem yngri flokka þjálfari hjá Stjörnunni ásamt því að halda fyrirlestra fyrir íþróttafélög! Hilmar Árni er með MA í heimspeki frá Háskóla Íslands auk þess sem hann útskrifast með UEFA A þjálfaragráðu snemma á næsta ári.
Við bjóðum Hilmar Árna velkominn til starfa!
