Gareth Bale hefur í fyrsta sinn opinberað ástæðuna fyrir því að hann ákvað að hætta að spila knattspyrnu aðeins 33 ára gamall.

Samkvæmt Bale varð ákvörðunin til þegar faðir hans veiktist skyndilega og hann áttaði sig á að lífið væri meira en bara fótbolti.

Wales-goðsögnin, sem er bæði leikjahæsti og markahæsti leikmaður þjóðarinnar, vakti athylgi þegar hann tilkynnti ákvörðun sína í janúar 2023, skömmu eftir að Wales féll úr leik í riðlakeppni HM í Katar.

Þar endaði liðið á botni riðils með Englandi, Bandaríkjunum og Íran.

Bale sagðist á sínum tíma hafa verið ótrúlega heppinn að hafa lifað draum sinn og að fótboltinn hefði gefið honum stórkostlegustu augnablik lífsins.

Hann lauk ferlinum hjá LAFC í Bandaríkjunum þar sem hann vann MLS-bikarinn, síðustu verðlaun hans í safnið sem inniheldur einnig fimm Meistaradeildartitla.

Í viðtali við GQ segir Bale nú: „Pabbi varð veikur og það hafði gríðarleg áhrif á ákvörðunina. Fólk veit ekki alltaf hvað er að gerast heima hjá manni, en ég áttaði mig fljótt á að það er meira í lífinu en fótbolti.“

Hann hefur ítrekað hrósað föður sínum, Frank, fyrir að hafa fórnað öllu til að hjálpa honum að ná árangri.