Nýliðar Aftureldingar geta lent í meiri vandræðum í Bestu deild karla en umræðan gefur til kynna. Þetta segir Hrafnkell Freyr Ágústsson í nýjasta þætti af Íþróttavikunni hér á 433.is, þar sem rætt var um komandi leiktíð hér heima.

Afturelding komst upp í gegnum umspil Lengjudeildarinnar í fyrra og styrkti sig vel fyrr í vetur. Liðið fékk til sín bræðurna Axel Óskar og Jökul Andréssyni. Þá kom reynsluboltinn Oliver Sigurjónsson og Þórður Gunnar Hafþórsson.

„Mér finnst of lítið talað um þetta en Afturelding getur fallið. Það eru allir á því að þetta verði bara ekkert mál. En þegar þú horfir á hópinn eru þetta kannski 5-6 leikmenn sem hafa spilað í úrvalsdeild að einhverju ráði,“ sagði Hrafnkell í þættinum og benti á að fleiri hefðu styrkt sig vel í vetur.

„Þetta er alveg hörkulið, en Vestri hefur sem dæmi styrkt sig mjög vel.“

Þess má geta að Sigurbjörn Hreiðarsson var gestur þáttarins og var snert á öllum liðum í Bestu deildinni fyrir komandi leiktíð.