Það hefur mikið verið rætt og ritað um 115 ákærurnar á hendur Manchester City fyrir brot á fjármálareglum. Jóhann Már Helgason sparkspekingur er vel að sér í þessum efnum og útskýrði þetta á mannamáli í Íþróttavikunni hér á 433.is.

Mál City verður tekið fyrir í haust og fólk veltir því fyrir sér hvernig refsingu félagið hlýtur, verði það fundið sekt.

„Það eru margir að velta því fyrir sér hvort titlar City verði dæmdir í burtu. Þetta er auðvitað algjörlega fordæmalaust en þeir sem vita mest um þetta telja ólíklegt að þeir breyti sögunni, þeir láti refsinguna gilda í framtíðinni. Þá yrðu dæmd af þeim stig eða í versta falli þeir dæmdir niður um deildir,“ segir Jóhann.

Þó ákærurnar séu 115 eru ákæruliðirnir aðeins fáir.

„Þetta eru bara fjórir eða fimm ákæruliðir og svo eru margar ákærur undir þeim liðum. Það sem er helst í þessu er að þeir hafi hreinlega falsað ársreikninga sína. Til að draga þetta saman stutt er það þannig að kostnaður sem átti að lenda á félaginu hafi verið greiddur utan félags, sem hafi þá ýtt þeim yfir FFP reglurnar og þar með hefði átt að draga af þeim stig. Þetta er bara dæmi. Og þeir hefðu þurft að greiða sektir og þar fram eftir götunum.

Svo er verið að tala um að þessir samningar við styrktaraðila séu bara ólöglegir og of nátengdir þriðja aðila. Í grunninn eru þetta þessi atriði. Nærtækt dæmi er að Roberto Mancini (fyrrum stjóri City) var að þiggja greiðslur frá Abú Dabí. Í ákærunni vilja þeir meina að það hafi verið partur af hans launapakka. En City vill meina að svo sé ekki, að þessir samningar séu löglegir,“ segir Jóhann.

City hefur áður verið dregið fyrir dómstóla en fyrir nokkrum árum síðan dæmdi UEFA félagið í bann frá Evrópukeppnum. Dómnum var snúið við í CAS (Aljþoða íþróttadómstólnum). Það sama verður ekki uppi á teningnum í ár.

„City hefur haft afskaplega góða lögfræðinga á sínum snærum en munurinn er sá að þessi dómur getur ekki farið fyrir CAS (Alþjóða íþróttadómstólinn). Þetta fer fyrir ensku úrvalsdeildina og þennan sjálfstæða dómstól þess. Svo að lokum, ef þeir vilja áfrýja, eru það bara breskir dómstólar.“

Umræðan um þetta er í heild í spilaranum hér ofar.