Á dögunum varð ljóst að Arnór Sigurðsson verður ekki með íslenska landsliðinu gegn Úkraínu í úrslitaleik um sæti á EM vegna meiðsla. Þetta var rætt í hlaðvarpi Íþróttavikunnar en ljóst er að um mikið áfall er að ræða.
Arnór varð fyrir ljótri tæklingu í undanúrslitaleiknum sem leikmaður Ísraela uppskar rautt spjald fyrir. Svo varð ljóst að Arnór gæti ekki spilað gegn Úkraínu í Póllandi annað kvöld.
„Það var bara líkamsárás hvernig Ísraelinn jarðaði hann. Það var enginn vilji til að sækja boltann, bara meiða,“ sagði Hörður Snævar Jónsson í þættinum.
„Mér finnst algjört áfall að missa Arnór. Mér fannst hann með betri mönnum í síðasta leik. Það var mjög jákvæð ára yfir honum, hann var að peppa varnarlínuna sem var í smá rugli í byrjun, sinnti varnarhlutverkinu sínu gríðarlega vel. Það er mikill söknuður af honum,“ sagði Helgi áður en Hörður tók til máls á ný.
„Maður hefur séð það á síðustu tveimur árum að hann hefur lært að vera landsliðsmaður. Hann er ómhemju duglegur varnarlega.“
„Kantmennirnir okkar þegar okkur hefur gengið hvað best hafa alltaf verið þrælduglegir varnarlega,“ skaut Helgi inn í.
„Þetta er bakvörður númer 2. Þannig virkar þetta þegar þú ert í íslenska landsliðinu,“ sagði Hörður að endingu um málið.
