Freddy Adu átti eitt sinn að verða næsta stórstjarna fótboltans. Hann varð yngsti atvinnuíþróttamaður sögunnar árið 2003, þá 14 ára gamall. Bandaríkjamaðurinn stóð hins vegar aldrei undir væntingum.

Ungur að árum var Adu líkt við Pele og fór hann til að mynda á reynslu hjá Manchester United.

Árið 2007 hélt hann til Evrópu og skrifaði undir hjá Benfica en hlutirnir gengu aldrei upp og var hann lánaður víða á fjórum árum sínum þar. Fyrst fór hann á láni til Monaco.

„Ég vonaðist til að öðlast meiri stöðugleika í öðru liði en það var röng ákvörðun. Fyrir mér er þetta mesta eftisjáin á ferlinum. Ég var ekki nógu þroskaður til að höndla allar freistingarnar á tíma mínum hjá Monaco,“ sagði Adu í viðtali á dögunum.

„Það kom niður á leik mínum. Ég kenni engum um nema mér sjálfum. Ég ákvað að fara, enginn sagði mér að gera það,“ sagði Adu sem sér eftir að hafa ekki verið lengur hjá Benfica til að berjast fyrir sæti sínu.

Adu flakkaði svo víða á ferlinum, fór til að mynda til Svíþjóðar og Finnlands áður en hann lagði skóna á hilluna árið 2021, 32 ára gamall.