Sjónvarpsmaður BBC sá sig knúinn til að biðjast afsökunar eftir ummæli í beinni eftir leik Liverpool gegn West Ham í deildabikarnum í síðustu viku.

Liverpool vann leikinn 5-1 og flaug inn í undanúrslit deildabikarsins þar sem liðið mætir Fulham.

Chetan Pathak, sjónvarpsmaður á BBC, ræddi sigurinn eftir leik í beinni og sagði meðal annars eftirfarandi um Jurgen Klopp, stjóra Liverpool:

„Við sáum hann hnefa (e. fisting), kýla hnefunum út í loftið,“ sagði Pathak í beinni fréttaútsendingu á BBC.

Pathak baðst svo afsökunar á að hafa óvart notað kynferðislegt orðalag um Klopp.

„Ég biðst afsökunar. Framvegis mun ég halda mig við textann sem er fyrir framan mig,“ skrifaði hann á samfélagsmiðla.