Leiknir tapaði nokkuð óvænt fyrir Selfossi í síðustu umferð Lengjudeildar karla. Breiðhyltingar voru til umræðu í síðasta þætti Lengjudeildarmarkanna, sem sýnd eru hér á 433.is og í Sjónvarpi Símans.

Leiknir vann nýliða Þróttar 1-3 í fyrsta leik en tapaði svo 2-3 gegn Selfossi. Liðið hefur ekki verið svo sannfærandi í upphafi móts.

„Þeir eru að valda vonbrigðum en það verður að taka inn í myndina að þeir eru búnir að vera með Sigurð Höskuldsson sem þjálfara í svolítinn tíma. Þeir fengu Fúsa (Vigfús Arnar Jósepsson) inn og hann er í svipuðum pælingum og Siggi. Hann vill spila fótbolta. En mér finnst þetta aðeins ýktara hjá Fúsa.

Það er rosalega mikið possesion, verið að spila frá markmanni. Stundum er þetta svolítið glæfralegt. Ég held að hann sé að finna sig. Hann vill spila út frá markmanni og spila fótbolta. En hann þarf að sigta út hvað þeir geta og hvað ekki,“ segir Hrafnkell Freyr Ágústsson, sérfræðingur Lengjudeildarmarkanna.

Hrafnkell hafði áður sagt að Leiknir, sem féll úr Bestu deildinni í fyrra. ætti að berjast við toppinn í Lengjudeildinni.

„Ég held að ég hafi verið full fljótur á mér um daginn að segja að Leiknir ætti að fara upp miðað við hóp. Hann er ungur, nýr þjálfari og ætti að fá smá slaka.“

Þáttinn í heild má sjá hér að neðan.