Óvissa ríkir um það hvað verður um Kórdrengi sem skráðir eru til leiks í Lengjudeild karla í sumar. Liiðið á að hefja leik í Lengjubikarnum á morgun en óvíst er hvort það takist.

FH hefur átt í viðræðum um að sjá um lið Kórdrengja í sumar.

Á vef Fótbolta.net segir í dag að FH sé í viðræðum um að Ejub Purisevic taki við þjálfun liðsins. „Samkvæmt heimildum Fótbolta.net hefur FH boðið Ejub Puricevic að taka við þjálfum liðsins og hann hefur verið að íhuga málið. Ef hann segir nei er búist við að FH hætti við að taka yfir félagið,“ segir í frétt Fótbolta.net.

Samkvæmt fréttinni veltur þessi yfirtaka FH á Kórdrengjum því á því hvort Ejub sé klár í slaginn.

Ejub er með mikla reynslu en hann hefur síðustu ár starfað í yngri flokka starfi Stjörnunnar, þar hætti hann í haust og hefur verið án starfs síðan.

FH hefur stefnt að því að taka yfir Kórdrengi síðustu vikur og láta liðið vera stað fyrir unga leikmenn félagsins.

Kórdrengir hafa ekki æft í vetur eftir að Davíð Smári Lamude hætti störfum og tók við sem þjálfari Vestra.