The Sun skýrir frá þessu. Fram kemur að Olsen hafi verið heima ásamt eiginkonu sinni og tveimur ungum börnum, 5 og 2 ára, þegar hópurinn braut sér leið inn, sveiflaði sveðjum og hnífum og krafðist þess að fá verðmæti afhent.
Eiginkonu Olsen, Mia, og börnunum var haldið af hluta hópsins á meðan einn ræningjanna gekk um húsið með Olsen og ógnaði honum með hníf og heimtaði verðmæti. Eins og gefur að skilja óttaðist Olsen um öryggi fjölskyldu sinnar og afhenti ræningjunum dýra skartgripi og úr.
Ekki er langt síðan að Carlo Ancelotti, þjálfari Everton, lenti í svipuðu ráni á heimili sínu i Hale Barns í Cheshire. Það átti sér einnig stað á laugardegi.
The Sun hefur eftir heimildarmanni að þetta hafi ekki bara verið rán, heldur versta tegund innrásar á einkaheimili. „Gengi vopnað sveðjum ógnar eiginkonu þinni og börnum,“ sagði heimildarmaðurinn.
„Robin var skelfingu lostinn. Hann hefur engar áhyggjur af mununum sem var stolið, en áhrifin sem þetta hafði á fjölskylduna eru áhyggjuefni. Þau eru í miklu áfalli. Þetta er versta martröð allra foreldra. Fjölskyldan er flutt úr húsinu og félagið hefur látið alla leikmennina fá öryggisverði.“
Hverfið sem Olsen býr í er vinsælt meðal leikmanna i ensku úrvalsdeildinni. Heimildarmaður The Sun sagði að öllum leikmönnum hafi verið sagt að efla öryggisgæslu sína. „Fréttir af þessu ráni láta fótboltaheiminn nötra því það var látið til skara skríða þegar vitað var að leikmaðurinn og fjölskylda hans voru heima,“ sagði hann.
