Beitir Ólafsson, markvörður KR-inga, sagði í viðtali eftir leikinn að hann vissi ekki á hvað hafi verið dæmt. „Kiddi (Kristinn Jónsson) fékk engin skilaboð um hvað hann ætti að gera og leggur boltann til baka á mig. Hann boppar aðeins illa og ég hitti hann illa,“ segir Beitir í viðtalinu. „Í augnablikinu á eftir þegar ég er að fara að reyna að verja frá Guðmundi Stein rekst ég í KA-mann held ég. Ég hleyp á hann eða hann hleypur á mig og það getur vel verið að hann hafi dæmt brot á það. Ég veit það ekki.“
„Það var talað um í frábærum podcast þætti Doc fyrir dálitlu síðan að sumir dómarar kunni ekki reglurnar. Ekki mun sú umræða minnka eftir atvikið á Akureyri,“ segir fjölmiðlamaðurinn Ríkharð Guðnason, einnig þekktur sem Rikki G, á Twitter síðu sinni í gær. „Alveg með ólíkindum og eiginlega ófyrirgefanleg slík ákvörðun. Rangstaða dæmd þegar markvörður kixar boltann.“
Ásgeir nokkur svarar Rikka og segir honum að skoða atvikið aðeins nánar. „Mögulega besti dómur sumarsins,“ segir Ásgeir. Rikki svarar Ásgeiri þá og segir markvörð KR-inga hafa verið í engu jafnvægi. „Þó þeir rekist saman er það ekki Ásgeiri að kenna frekar en Beiti. Beitir vissi ekki einu sjálfur hvað var dæmt á. Í mínum bókum alltaf mark.“
Birkir Örn Pétursson, stuðningsmaður KA, bendir á að Ívar hafi einnig dæmt leik FH og KA sem fór fram í síðustu umferð. Í upphafi síðari hálfleiks þess leiks kom Guðmundur Steinn boltanum í netið en Ívar dæmdi markið ógilt vegna brots á Gunnari Nielsen markmanni FH í aðdragandanum. „Við KA menn erum ekki aðdáendur hans Ívars þessa stundina!“ segir Birkir.
Þóroddur Hjaltalín, formaður dómaranefndar KSÍ, segir í samtali við Fótbolti.net að þegar horft er á atvikið í endursýningu sjáist að um réttan dóm sé að ræða „Ásgeir er í rangstöðu og hefur áhrif á Beiti með því að fara í hann. Með því að fara í Beiti þá truflar það hann. Þannig að þetta er hárrétt ákvörðun. Rangstaða,“ sagði Þóroddur.
