Félög í ensku úrvalsdeildinni eru byrjuð að hóta félögum í fallbaráttu að þau verði dæmd niður, haldi þau áfram að vera með vandræði. Félögin í fallbaráttu vilja ekki hefja tímabilið á hlutlausum velli eins og allt stefnir í.

Stærri lið deildarinnar hóta því að fara fram með hörku ef félögin ganga ekki að þeim kröfum, þeim er hótað að tímabilið verði látið standa og lokastaða reiknuð út frá meðalstigum.

Þá myndu Norwich, Aston Villa og Bournemouth falla úr deildinni án þess að spila restina af tímabilinu.

Ríkisstjórn Boris Johnson, hefur beðið allar stærstu íþróttagreinar landsins um að byrja að undirbúa endurkomu. Ríkisstjórnin vonast til þess að íþróttir fari af stað í byrjun júní, með þessu vilja þau reyna að létta lundina hjá þjóðinni eftir erfiða tíma. Ekki hefur verið spilað í tæpa tvo mánuði vegna kórónuveirunnar.

„Það er enginn vafi á því að það eru deilur innan ensku úrvalsdeildarinnar, það er mismunandi hvað félögin vilja. Skilaboð til allra var frá fyrsta degi í þessu ástandi að standa saman og vera góð við hvert annað,“ sagði Gary Neville sérfræðingur Sky Sports um stöðuna.

,,Fótboltaheimurinn er ekki góður þessa dagana, þeir hugsa um eigin hagsmuni og það er skítkast á bak við tjöldin. Heilsa fólk er ekki til umræðu, auðvitað þarf félag að falla ef spilað verður.“

,,Að komast upp úr deild eða falla er eitthvað sem heldur leik okkar á floti. Að bera England saman við Þýskaland er ekki hægt, þeir tóku miklu betur á veirunni en við.“