Ólafur Kristjánsson þjálfari FH, viðurkennir að sínir menn hafi átt skilið að tapa leik kvöldsins gegn ÍA.
ÍA fékk FH í heimsókn í fjórðu umferð Pepsi Max-deildar karla og hafði betur, 2-0 á Akranesi.
,,Við fáum á okkur mark mjög snemma og Skagamenn gera það vel á 3 eða 4 mínútu,“ sagði Ólafur við Stöð 2 Sport.
,,Boltinn fer beint í hendurnar á Árna og það kemur Skagamönnum í góða stöðu. Við náðum ekki að herja á þá nógu vel til að jafna.“
,,Svo þegar við vorum að reyna það þá skora þeir annað. Þeir voru betri í þeirra gameplani og þeir unnu þennan leik verðskuldað.“
Pétur Viðarsson fékk beint rautt spjald í síðari hálfleik en hann talaði illa til aðstoðardómara leiksins og spurði hvort hann væri ‘fokking þroskaheftur’.
,,Mér skilst að þetta hafi verið eitthvað ósæmandi að mati Péturs dómara en það er ómögulegt fyrir mig að segja hvað það var. Ég treysti því að sú ákvörðun hafi verið rétt.“
,,Við mættum ekki illa til leiks, við vissum að þeir væru góðir í skyndisóknum og við gefum beint á markmanninn. Við þurfum að laga það.“