Sóknin er nýr hlaðvarpsþáttur á 433.is, eftir hverja einustu umferð í Pepsi Max-deild karla í sumar, þá munum við gera hlutina upp.

Við fáum góða gesti til okkar en að þessu sinni var það Bjarni Helgason, blaðamaður á Morgunblaðinu.

Íslandsmeistarar Vals voru í umræðunni í þætti dagsins en Valsmenn hafa ekki byrjað sannfærandi í sumar.

Leikmannakaup Vals hafa verið á milli tannanna á fólki en leikmenn eins og Dion Acoff og Patrick Pedersen eru farnir annað.

Menn á borð við Emil Lyng, Lasse Petry, Hannes Þór Halldórsson, Kaj Leo í Bartolsstovu og Gary Martin sömdu þá við liðið fyrir mót.

Það má deila um það hvort þessi kaup séu rétt fyrir Valsliðið og voru þau rædd í þætti dagsins.

,,Ég fór að hugsa þetta áður en við fórum í tökur. Mig minnir að hann hafi sagt fyrir mót að hann vissi sitt sterkasta byrjunarlið,“ sagði Hörður Snævar Jónsson, ritstjóri 433.is.

,,Við sjáum það að hann hefur ekki hugmynd um það, í annarri umferð er hann búinn að skipta út miðverði, Hedlund er kominn inn fyrir Orra. Andri Adolphs var ekki í hópnum í fyrsta leik gegn Víking og svo á bekknum ónotaður gegn FH. Svo byrjar hann gegn KA.“

,,Emil Lyng hefur byrjað og farið á bekkinn. Hann veit ekki alveg hvert byrjunarliðið er og sóknarlínan er alveg ný. Mín upplifun af henni er að þarna hafi bara verið keypt nöfn, Kaj Leo hefur verið fínn í deildinni með ÍBV, Gary Martin hefur raðað inn þegar hann spilar á Íslandi og Emil Lyng var flottur í KA.“

Bjarni tekur undir þessi ummæli og ræðir sérstaklega Kaj Leo sem hefur ekki þótt byrja sannfærandi á Hlíðarenda.

,,Ég er 100 prósent sammála þessu. Kantspilið er ógeðslega lítið, Kaj Leo er gæi sem köttar inn, hann keyrir ekki upp kantinn eins og Dion Acoff gerði.“

,,Hann er svo allt öðruvísi leikmaður. Mér finnst hann ekki henta þessu Valsliði neitt.“

,,Hann sýndi samt alveg á móti FH í bikarnum, hann leggur upp markið fyrir Birni. Það er alveg spil í honum en Óli þarf svolítið að ná því úr honum. Hjá ÍBV hefur hann fengið boltann, hangið á honum og gert það sem hann vill.“