Hlaðvarpsþátturinn, 90 mínútur hefur hafið göngu sína en um er að ræða þátt sem Hörður Snævar Jónsson, ritstjóri 433.is stýrir.
Rætt verður um fótbolta við áhugaverða gesti í vetur, farið verður um víðan völl.
Gestur þáttarins að þessu sinni er Ólafur Ingi Skúlason sem er 35 ára gamall en hann hefur átt magnaðan feril, byrjaði hann með Fylki en hélt síðan til Arsenal.
Ólafur ræddi aðeins Thorgan Hazard, fyrrum liðsfélaga sinn en þeir voru saman hjá Zulte Waregem í Belgíu. Ólafur lék með liðinu frá 2011 til 2015.
Thorgan er yngri bróðir Eden Hazard en sá síðarnefndi leikur með Chelsea og hefur gert í mörg ár.
Ólafur var alltaf mjög hrifinn af Thorgan sem leikmanni en hann spilar í dag fyrir Borussia Monchengladbach í Þýskalandi.
Fólk teiknar upp ákveðna mynd þegar kemur að Thorgan og að hann hafi komist svo langt á nafninu. Það er hins vegar ekki rétt.
,,Fyrst þá gerði ég alveg í því að hnoðast á honum á æfingum. Ég hugsaði með mér að þetta væri týpísk prímadonna sem væri hérna því hann á frægan bróður,“ sagði Ólafur.
,,Ég var búinn að búa þá staðalímynd til og var að hnoðast og djöflast í honum, láta hann finna aðeins fyrir því en hann kom alltaf til baka. Hann lét mig finna fyrir því til baka og kvartaði aldrei eða kveinaði.“
,,Hann var ótrúlega skemmtilegur og hress og hann er einn af mínum uppáhalds meðspilurum í gegnum minn feril.“
,,Það var ótrúlega gaman að vera í kringum hann, hann var ótrúlega glaður og jákvæður og í rauninni allt öðruvísi en ég hélt.“
,,Hann var engin prímadonna og það voru engir stælar í honum. Maður fann það bara hversu gaman honum fannst í fótbolta og hvað hann var viljugur til að bæta sig og viljugur til að sýna sig. Hann var frábær liðsfélagi og það var ótrúlega gaman að hafa upplifað þessi tvö tímabil með honum.“
,,Þetta var allt skrítið hvernig var haldið utan um þetta. Hann var í Lens þegar hann kemur til okkar og skrifar undir samning við Chelsea og er lánaður til okkar. Það meikaði ekki sens að Chelsea væri að kaupa hann.“
,,Þá um leið ertu búinn að festa hann við bróðirinn. Að hann fengi samning útaf bróður sínum. Það er ekki sanngjarnt gagnvart honum. Hann var þarna besti leikmaður í belgísku deildinni á þessum tímabilum.“
,,Hann er kannski búinn að fara rétta leið í þessu, hann fer til Monchengladbach og spilar þar alla leiki. Hann er svona þeirra aðal vopn fram á við. Ég vona fyrir hans hönd, hann á skilið að komast í ennþá stærra lið og í einhverja Meistaradeildarbaráttu. Hann á það skilið.“