Hörður Snævar Jónsson skrifar frá Rússlandi:
Það stefnir allt í það að Aron Einar Gunnarsson, fyrirliði Íslands verði leikfær gegn Argentínu á laugardag.
Þá fer fram fyrsti leikur Íslands á HM en Aron Einar fór í aðgerð á hné í lok apríl.
Þessi magnaði leikmaður hefur svo verið í stífri endurhæfingu til að ná bata.
Aron tók ekkert þátt í fyrstu æfingu Íslands í Rússlandi en í fyrradag æfði hann að fullum krafti. Þetta sagði Ari Freyr Skúlason, leikmaður Íslands við 433.is í dag.
Það er því ljóst að Aron ætti að geta byrjað leikinn gegn Argentínu ef ekkert bakslag kemur.
