IKEA hvetur viðskiptavini til að koma með PATRULL öryggishlið í verslunina og fá endurgreitt
IKEA hafa borist tilkynningar um hlið sem opnuðust við álag þannig að börn hafi dottið niður stiga og hlotið væg meiðsl. Ekki hafa borist tilkynningar hér á landi. Rannsókn þriðja aðila leiddi í ljós að búnaðurinn sem á að læsa hliðinu sé ekki nógu áreiðanlegur, þrátt fyrir að uppfylla tilheyrandi staðla.
Þetta kemur fram í tilkynningu frá IKEA sem hvetur viðskiptavini til að koma með PATRULL öryggishlið í verslunina og fá endurgreitt.
„Við gerum engar undantekningar þegar öryggi barna er annars vegar. Við viljum bjóða upp á vörur sem eru öruggar og heilsusamlegar fyrir mikilvægasta fólkið. Ef við höfum minnsta grun um að öryggi sé ábótavant í vörunum okkar, bregðumst við við því. Við getum ekki sætt okkur við að leikur barna feli í sér mögulega hættu og því innköllum við öll PATRULL öryggishlið,“ segir Maria Thörn, viðskiptastjóri í Barna IKEA, í tilkynningunni.
Þrátt fyrir að hliðin uppfylli stranga öryggisstaðla, gefur IKEA engan afslátt hvað öryggi barna varðar og hvetur alla viðskiptavini sem eiga PATRULL öryggishlið til að koma með það í verslunina og fá endurgreitt, að því er segir í tilkynningunni.
PATRULL öryggishlið, PATRULL KLÄMMA og PATRULL FAST hafa verið seld á öllum markaðssvæðum IKEA. Ekki þarf að sýna greiðslukvittun til að fá endurgreitt. Nánari upplýsingar má finna á www.IKEA.is og í þjónustuveri IKEA í síma 520 2500.