„Ég hef aldrei verið vöðvameiri eða með minni fituprósentu en núna,“ segir hin tuttugu og sex ára gamla Kelsey Wells. Margir eiga það til að einblína á vigtina þegar kemur að því að koma sér í form. Staðreyndin er samt sú að kílóafjöldinn segir langt því frá alla söguna eins og Kelsey sýnir og sannar.

Kelsey er virtur heilsubloggari og á myndunum hér að ofan má sjá þrjár myndir af henni sem teknar eru á mismunandi tímum. Á myndinni lengst til vinstri er Kelsey 65 kíló, á myndinni í miðjunni er hún 55 kíló og á myndinni lengst til hægri er hún 63 kíló.

Í færslu sem vakið hefur mikla athygli hvetur Kelsey konur – og karla – til að hætta að einblína á vigtina og kílóafjöldann. Hún segir að fólk ætti fremur að einbeita sér að því að komast í gott form – eins og myndirnar sýni geti kílóafjöldinn ruglað fólk í ríminu.

Kelsey er búsett í Texas og er hún vinsæl á samskiptamiðlinum Instagram þar sem yfir 300 þúsund manns fylgjast með daglegu lífi hennar.

Á myndinni lengst til vinstri má sjá Kelsey þegar hún var tiltölulega nýbúin að eignast barn. Á myndinni í miðjunni voru nokkrir mánuðir liðnir frá barnsburðinum og hafði Kelsey þá byrjað að hreyfa sig á nýjan leik. Á myndinni til hægri hafði Kelsey lyft lóðum í nokkra mánuði og þyngst í samræmi við það – þar sem vöðvar eru þyngri en fita.

„Eins og sést á myndum til vinstri og hægri er aðeins tveggja kílóa munur en líkamslögunin hefur tekið stakkaskiptum. Ég hef aldrei verið heilbrigðari en einmitt núna og aldrei liðið betur í eigin líkama,“ segir Kelsey sem bætir við að áður fyrr hafi hún stigið á vigtina á því sem næst hverjum degi. Þegar hún ákvað að hætta því segist hún hafa öðlast ákveðið frelsi.