Andrew Shapiro, sautján ára bandarískur piltur, setti nýtt heimsmet í upphífingum á dögunum. Óhætt er að segja að fáir standi Shapiro snúning þegar kemur að því að hífa sig upp.

Shapiro setti í raun þrjú heimsmet um síðustu helgi; flestar upphífingar á sex klukkustundum; flestar upphífingar á tólf klukkustundum og flestar á 24 klukkustundum.

Í heildina gerði Shapiro 7.306 upphífingar, en hann hefur æft stíft undanfarna sex mánuði. En hvers vegna ákvað hann að leggja þetta á sig? Fyrir utan þá staðreynd að það er eflaust svalt fyrir sautján ára ungling að eiga heimsmet í Heimsmetabók Guinness fékk hann innblástur af öðru. Faðir hans glímir við ristilkrabbamein og vildi Shapiro safna áheitum fyrir hann og um leið vekja athygli á þessari tegund krabbameins.

Shapiro hefur æft stíft undanfarna sex mánuði og horft á bíómyndir, Star Wars og Indiana Jones, meðan hann æfði sig. Eftir sex klukkustundir var hann búinn að gera 3.515 upphífingar, þær voru orðnar 5.742 eftir tólf klukkustundir og þegar yfir lauk, eftir 24 klukkustundir, voru þær orðnar 7.306.

Sló hann fyrra heimsmestið um 500 upphífingar og var hann auk þess sex klukkustundum skemur en fyrri heimsmethafinn. Shapiro safnaði sem nemur hálfri milljón króna. Faðir hans, Allen Shapiro, var stoltur eftir að heimsmet sonarins var í höfn: „Það er besta tilfinning í heimi þegar maður sér barnið sitt ná settu marki.“

[youtube https://www.youtube.com/watch?v=VeIhvK6OwzM&w=420&h=315]