Jólabörnin og systkinin Kristján, best þekktur sem KK og Ellen Kristjánsdóttir eru landsmönnum vel kunn, en þau hafa í mörg ár sungið og gefið út á plötu lagaperlur sem heillað hafa landsmenn og lifa munu með þjóðinni um ókomin ár. Helst ber þar að minnast á lagið I Think of Angels sem KK samdi og þau flytja til minningar um systur þeirra sem lést í bílslysi 1992.
KK og Ellen eiga bæði farsælan sólóferil að baki, hafa unnið með Magnúsi Eiríkssyni og fleiri listamönnum og í nokkur ár hafa þau tvö haldið jólatónleika saman. KK og Ellen hafa gefið út tvær jólaplötur saman, Jólin eru að koma árið 2005 og Jólin árið 2011.
Árið í ár er engin undantekning hvað jólatónleika varðar en líkt og áður verða þau á faraldsfæti og syngja jólalög í bland við sín eigin lög. Jafnframt segja þau sögur af sér og sínum sem laða fram gleði og jafnvel eitt og eitt tár. Látlaus og hugljúfur flutningur og framkoma KK og Ellen skapar einstaka og hugljúfa kvöldstund í aðdraganda jólanna.
Með þeim verður fimm manna úrvalssveit tónlistarmanna undir stjórn hljómborðsleikarans góða Jóns Ólafssonar.
Jólatónleikar þeirra systkina eru ómissandi liður í jólahaldinu og er miðasala nú í fullum gangi á midi.is og salurinn.is