Farið verður í framkvæmdir á borgarlínu, kynbundnum launamun verður eytt, áhersla verður lögð á lausnir fyrir fyrstu kaupendur húsnæðis og fjölga á dagforeldrum. Þetta er meðal þess sem nýr borgarstjórnarmeirihluti lofar að gera á kjörtímabilinu.

Ekki einu orði er minnst á að setja Miklubraut í stokk, sem var stóra loforð Samfylkingarinnar fyrir kosningar, í sáttmála Samfylkingarinnar, Pírata, Viðreisnar og Vinstri grænna. Hins vegar á að hefja framkvæmdir á borgarlínu, fjölga ferðum strætó og lengja gjaldskyldutíma bílastæða. Einnig á að gera Laugarveg að göngugötu.

Meirihlutinn leggur áherslu á að brúa bilið milli fæðingarorlofs og leikskóla með því að fjölga dagforeldrum og fjölga ungbarnadeildum. Ekki er talað um launahækkanir kennara upp á 100 þúsund krónur á mánuði líkt og Viðreisn lofaði en rætt er um að bæta kjör, leiðrétta laun kvennastétta og útrýma kynbundnu ofbeldi.

Varðandi húsnæðismál er rætt um að byggja hraðar og finna hagkvæmar lausnir við uppbyggingu. Byggja á húsnæði í Úlfarsárdal, Elliðaárvogi, Skeifunni, Höfða, Skerjafirði og Bryggjuhverfi.